(Washington, DC) 10 Luulyo 2019 – Danjirihii UK u fadhiyay dalka Maraykanka, Sir Kim Darroch, ayaa xilkaa iska casiley ka gadaal markii uu MW Donald Trump wacad ku maray in aanu dib ula hadli doonin, kaddib markii ay bexeen kayballo muujinaya Danjiraha oo caayaya Trump oo uu ku sheegay ”nin aan saaxi ahayn.”
Sir Kim ayaa sheegay inuu sidaa u yeelay si uu usoo af jaro gubatada diblomaasiyadeed ee ka kacday labada dal ee Maraykanka iyo Britain oo ah laba jaal oo inta badan isu dhow.
Sir Kim Darroch ayaa Trump ku tilmaamay mid “bilaa xirfad ah,” “damiin ah,” isla markaana “sirgaxan” isagoo xaaladda iminka ee Aqalka Cad ku tilmamay mid ”aan shaqaynayn.” Yeelkeede, waxayna taasi abuurtay weji gabax iyo yax yax diblomaasiyadeed oo labada dal dhexmaray.
Waxay taasi deeto soo faruurtay daad aflagaaddo ah oo Danjiraha kaga imanayay dhanka Madaxwaynaha Maraykanka oo awalba ahaa qofka ugu dambeeya ee akhyaarnimo lagu xanto, isagoo cambaareeyay xitaa RW Britain ee Theresa May oo uu siyaasadeeda Brexit ku tilmaamay ”mid musiibo ah” iyo sidoo kale Sir Kim.
Intaa kaddib, Wasiir Dibadeedka Britain Jeremy Hunt ayaa weerar ku qaaday MW Maraykanka ee Donald Trump isagoo dhaliisha shaaca ah ee uu u jeediyay ku tilmaamay “mid khaldan oo xushmad darro ah.”
Arrintan ayaa xitaa kala qaybisay horseedka siyaasadda Britain oo ay qaarkood ka safteen Danjirohoodii iyaguu la dhacsan warka Trump, sida Boris Johnson oo qolqollada awoodeed ee London looga arko nin aan sidaa u xikmad badnayn.
1/2 @realDonaldTrump friends speak frankly so I will: these comments are disrespectful and wrong to our Prime Minister and my country. Your diplomats give their private opinions to @SecPompeo and so do ours! You said the UK/US alliance was the greatest in history and I agree… https://t.co/hNeBWmyyVN
— Jeremy Hunt (@Jeremy_Hunt) July 9, 2019
2/2…but allies need to treat each other with respect as @theresa_may has always done with you. Ambassadors are appointed by the UK government and if I become PM our Ambassador stays.
— Jeremy Hunt (@Jeremy_Hunt) July 9, 2019
Hadalsame Media
