(Moscow) 26 Okt 2023 – Israel ayaa ugu baaqday Moscow inay masaafuriso ergada wada xaajoodka halkaa u timid ee Xamaas, iyadoo martigelintooda ku tilmaantay fal lagu taageerayo argagixisada iyo inay sharciyad u siinayaan gumaadka dadkeeda.
“Xamas waa urur argagaxiso oo ka daran ISIS,” Afhayeenka Wasaaradda Arrimaha Dibedda ee Israa’iil, Lior Haiat, ayaa ku yiri hadal uu soo dhigay X, oo hore u ahaan jirey Twitter, isagoo ula jeeda kooxda argagixisada ah ee IS.
“Israa’iil waxay cambaaraynaysaa martiqaadka madaxda sare ee Xamaas ee Moscow, taasoo ah fal lagu taageerayo argagixisada, waxayna xalaalaynaysaa xadgudubyada argagixisada Xamaas,” ayuu ku daray Haiat. “Waxaan ugu baaqaynaa Dowladda Ruushka inay si deg deg ah dalkeeda uga saarto argagixisada Xamaas.”
Hamas “waxay gowracday, dishay, oo gowracday oo gubtay” in ka badan 1,400 oo Israa’iiliyiin ah waxayna “afduubteen” 220 kale intii lagu jirey weerarkii 7-dii Oktoobar ee Israel, ayuu yiri Haiat.
Wasaaradda Arrimaha Dibedda ee Ruushka ayaa xaqiijisay Khamiistii maanta in wefdi ka socda Xamaas ay gaareen Moscow, kuwaasoo uu hoggaaminayo Moussa Abu Marzouk, oo ah xubin sare oo ka tirsan golaha siyaasadda ee kooxda.
Ruushka ayaa sheegay inuu kala xaajoonayo sii daynta dad Ruush ah oo ka mid ah dadka u qafaalan Xamaas.
Xamaas ayaa sidoo kale ogolaatay inay sii dayso dadka rayidka ah ee ay ka qabsatay Israel, sida uu xaqiijiyey WaD Iran, Hossein Amir-Abdollahian, balse waxay doonayaan in oodda laga qaado ilaa 6,000 oo Falastiiniyiin ah oo u xiran Israel.
Waxay arrintan la kaashanayaan dalalka Qadar iyo Turkiga.
Hadalsame Media
