Kuuriyada Woqooyi ayaa sheegtay in tillaabo kasta oo lagu qabanayo laguna soo ridayo gantaalaha ay tijaabiso loo qaadan doono “ku dhawaaqid dagaal”.
Hadalkan ayaa waxaa Talaadadan soo saartay Kim Yo Jong, oo ah walaasha awoodda badan ee la dhalatay hoggaamiyaha Kuuriyada Woqooyi ee Kim Jong Un, sida ku dhigan warbixin ay soo saartay oo ay xigatey warbaahinta Kuuriyada Koonfureed.
Warbixinta ayaa sheegaysa in Maraykanku uu qorshaynayo inuu soo rido gantaalaha baalistigga ah ee isaga kala goosha qaaradaha ee Pyongyang (ICBMs) haddii hubkaasi lagu tijaabiyo dhinaca Badwaynta Baasifigga.
Maraykanka iyo xulafadiisu weligood ma aysan soo ridin gantaalaha baallistigga ee Kuuriyada Woqooyi – oo sida caadiga ah lagu rido xaglo kacsan si looga fogaado waddamada deriska ah – laakiin dooddan cusubi waxay bilaabatay tan iyo markii ay Pyongyang soo jeedisey inay gantaalo badan dul marin doonto Japan.
Kim Yo Jong ayaase hadda sheegay in Pyongyang ay u arki doonto tillaabo kasta oo uu qaado millateriga Maraykanka ee ka dhan ah tijaabinta hubka istaraatiijiga ah “ku dhawaaqid dagaal”.
“Badwaynta Baasifiggu ma aha meel hoos tagta xukunka Maraykanka ama Japan,” ayay si kulul u tiri Kim Yo.
Hadalsame Media
