(Ankara) 03 Feb 2019 – Sannadkii hore markii uu MadaxweyneTrump isku dayayey in uu madax jebiyo Turkiga oo uu ogolaysiiyo in ay sii daayaan baadariga Mareykanka ah ee dalkaas ku xirnaa isagoo loo haystay inuu gacan ku lahaa inqilaabkii fashilmay ee Turkiga ka dhacay, waxa uu isku hallaynayey in tallaabooyinkii ciqaabeed ee uu dhinaca dhaqaalaha ka qaaday iyo ereyadii canaanta iyo liidista ahaa ee uu warbaahinta xidhiidhka bulshada marinayey, ay maaxweynaha Turkiga Rajab Dayib Erdogan ku qasbi doonaan in uu si dhaqso ah ugu hoggaansamo doonistiisa.
Warbixintan oo uu wargeyska Washington Post qoray, ayaa intaas ku sii dartay in maalmihii ay lacagta Lira ee dalka Turkigu aad hoos ugu dhacday, in uu madaxweynaha Turkigu ku guulaystay inuu cadhada dadkiisa ku jeediyo Mareykanka. isaga oo ka dhigay in waxa socdaa uu yahay burburin caalamiya oo dalkiisa ka dhan ah. Waxa uu dareenka dadka ka fogeeyey dhibaatada dhaqaale ee taagnayd.
TAAGEERO DIBADEED
Wargeyska Washington Post waxa uu warbixintiisan ku sheegay in dalka Turkigu uu cunaqabataynta Mareykanka kaddib ku guulaystay in uu taageero fiican oo waqtigeedii soo gaadhay ka helo saaxiibadiisa dibadda, arrintaas oo burburisay dadaalkii uu Donald Trump ku doonayey in uu dalka Turkiga ka dhigo dal go’doon ku jira.
Waxaa ka mid ah booqashadii uu wasiirka arrimaha dibadda Ruushku ku tegey Ankara, wadahadalkii uu madaxweynaha Faransiiska Emanuel Macron taleefanka kula soo xidhiidhay madaxweyne Erdogan, iyo lacagtii 15 ka bilyan ee doolar ahayd ee uu dalka Qatar ku maalgashaday dhaqaalaha Turkiga.
Washington Post waxa ay ka soo xigatay Leslie Hintz oo ah bare sare oo xidhiidhka caalamiga ah ka dhiga jaamacadda John Hopkins, in madaxweyne Rajab Dayib Erdogan uu awood u leeyahay in uu dhanka isaga u fiican uga ka faa’iidaysto masiibooyinka soo waajaha.
Ha yeeshee, sida muuqata uu Trump dhayalsaday hoggaamiyaha Turkiga oo caan ku ah garaad badnaan dhinaca xeeladaha ah. Si aad u fogna ugu qanacsan in quwaadaha reer galbeedku ay ku dadaalayaan sidii ay u curyaamin lahaayeen Turkiga, maadaama oo uu yahay dawlad muslim oo awood leh.
Trump waxa uu u daneeyey Erdogan
Hintz waxa kale oo ay Washington Post u sheegay in madaxweyne Donald Trump uu madaxweynaha Turkiga u daneeyey markii uu fuliyey cunaqabataynaha adag, bartiisa Twitter kana ku faafiyey hadallo degdeg iyo masuuliyad darro ka muuqato.
Waayo waxa ay u muuqatay, in ujeedada Trump ka leeyahay tallaabooyinkani ay yihiin in uu burburiyo dadaalka ay xukuumadda Turkigu ku doonaysay in ay dejiso suuqa iyo dadkeeda.
Hintz waxa ay intaas ku dartay in Trump uu u muuqday nin burburinaya dhaqaalaha Turkiga, waana sida uu madaxweynaha Turkigu doonayey in uu u sawiro dalka Mareykanka.
Dhinaca kalana Soli Ozil oo ah bare sare oo cilmiga xidhiidhka caalamiga ah ka dhiga jaamacadda Kadir Haas ee magaalada Istanbuul, dalka Turkiga ayaa sheegay in Erdogan uu mucaaradnimada gudaha kaga furan uu ku jiheeyo dibadda. Laakiin waxa cusubi uu yahay, in markan uu jihayntiisaas u hayo marag xoog badan oo caddayn u ah dooddiisii hore ee ahayd in ay jiraan dhinacyo shisheeyo oo leh qorsheyaal cadaawadeed oo Turkiga ka dhan ah.
“Tallaabooyinka adag ee Mareykanku keliya waxa ay noqdeen caddayn uu u helay sheegashadii ahayd in la doonayo in Turkiga dhabarka laga jebiyo” ayaa uu yidhi bare sare Ozil. Isaga oo intaas ku daray in cunaqabataynta uu Mareykanku saaray Turkigu ay dadka Turkiga badankooda ku beertay dareen ah in waxa socdaa aanu ahayn dhibaato dhaqaale, balse uu yahay dagaal dhaqaale oo Mareykanku uu dalkooda ku soo qaaday.
Wargeysku Washington Post waxa uu sheegay in taas maraggeedu uu yahay sida dhega nugaylka ah ee ay dadka Turkigu u qaateen codsigii Erdogan ee ahaa in aan la iibsan qalabka Elektarooniga ah ee lagu sameeyey dalka Mareykanka, iyo sida ay dadku u burburiyeen talefannadoodii gacanta ee iPhone ka ahaa iyaga oo la dhacayey madaraqyo iyo usha lagu ciyaaro kubadda Baseball, maadaama oo ay samayso shirkadda Apple ee dalka Mareykanka ahi.
Wargeysku waxa uu warbixintiisa ku soo gabagabeeyey, “Siyaasadda jar iska xoornimada ah ee Trump uu raacay, khatar kuma ay keenin Erdogan siyaasad ahaan marka la eego dalka gudihiisa.”
Turkiga ayaa haatan awood u leh in uu isagu farsameeyo in badan oo ka tirsan hubka muhimka ah sida dayuuradaha, maraakiibta heer dhexaadka ah, gantaalaha, tawaangida, qoryaha yar yar iwm. pic.twitter.com/nch3AncMsf
— Hadalsame Media (@HadalsameMedia) February 3, 2019
Turkiga ayaa haatan wada qorshe ay 100 bilyan oo doollar ku baxayso oo uu ku casriyaynayo hubkiisa iyo ciidamadiisa, taasoo aad uga badan miisaaniyadda guud ee dalal badan oo gobolka ku yaalla.
Waxaa Diyaariyay: Kamaal A Cali
Hadalsame Media
