(Muqdisho) 04 Nov 2018 – Guddoomiye ku-xigeenka amniga iyo Siyaasadda Maamulka Gobolka Banaadir Maxamed C/llaahi Tuulax ayaa sheegay maamulka Gobolka Banaadir inuu baaris ku sameeyay arrin ka dhacday Saldhiga Degmada Xamar jajab oo aheyd in ciidanka timaha ay ka jareen dhalinyaro dhawr ah, balse arrintaasi ay ku dhacday amar shaqsi ah oo aysan aheyn arrin uu ka war haayo Maamulka Gobolka Banaadir, balse si deg deg ah loogu sheegay dadkii fuliyay inay arrintaasi joojiyaan.
“Walaalayaal waxaa labadii maalmood ee lasoo dhaafay baraha bulshada la isla dhaxmarayay dhalinyaro timaha laga xiirayay oo ay fulinayeen ciidamo ka tirsan amniga waxaan ku sameeenay baaritaan si aan u ogaano inay sax tahay iyo in kale, walaalayaal sawirada la isticmaalayay ee ciidanka timaha ka xiiraya dhalinyarada ma ahan sawiro hada la qaaday balse dhacdada tima jarista waxay dhowr maalmood ka dhacday Saldhiga Xamar jajab, waxaana waydiinay Hay’adaha amniga cidda amartay in dhalinyarada timaha laga xiiro waxaana noo soo baxday inuu amarkaas ahaa amar shaqsi ah oo taliyaha saldhiga u gaar ahaa, waxaana amar ku bixinay inaan la aqbali karin waqtigaan hada aan ku jirno in dhalinyarada lagu caburiyo rabitaankooda shaqsiga ah, waxaana amar lagu bixiyay inaysan mar danbe soo noqon arintaan oo kale dhamaan taliyayaasha saldhigyadana waa lagaarsiiyay amarkaaas.” Ayuu yiri Gudoomiye Tuulax.
Guddoomiye Tuulax ayaa sidoo kale iftiimiyay amar dhawaan ka soo baxay Duqa Muqdisho oo lagu mamnuucay in 12:00 habeenimo wixii ka dambeeya aysan furnaan karin maqaayadaha ku yaallo xeebta Liido.
“Sidoo kale duqa magaalada wuxuu amray in maqaayadaha ku yaalla xeebta liido aysan furnaan karin 12 ka saqda dhexe wixii ka danbeeya balse amarkaas ma quseenin maqaayadaha kale ee magaalada ku yaalla ee sida caadiga ah loogu ganacsado waxaana dhacday in saraakiisha amnigu ay u fahmeen guud ahaan maqaaydaha magaalada ku yaalla in la xiro 12 ka saqda dhexe. Waxaana la faray hay’adaha amniga in amarkaas uu ahaa kaliya maqaayadaha xeebta liido ku yaalla”ayuu yiri Mr. Tuulax.
Hadalsame Media
