(Hadalsame) 19 Sebt 2021 – Waynta sarkaalad da’yar oo ka tirsanayd NISA, ayaa keentay hardan awoodeed oo dhexmaraya Madaxwaynaha iyo Raysal Wasaaraha Somalia, taasoo rajo cusub siinaysa kooxda mintidka ah ee Al Qaacida lala xiriiriyo, ayaa lagu bilaabay maqaal dheer oo lagu qoray warqaadka caanka ah ee Washington Post.
“Waqti kasta oo uu yimaado khilaafka gudeed ee noocan oo kale, waxay siyaabo kala duwan u anfacaysaa kooxda Shabaab. Wuxuu khilaafkani sidoo kale ka marag kacayaa wax kasta oo laga sheego DF sida inay tahay mid wax ku ool ahayn, daciif ah, qaybsan, isla markaana aan bulshada waxba u qaban.” ayuu yiri Omar Mahmood, oo ah falanqeeye Soomaali ah oo ka tirsan International Crisis Group.
Khilaafka ayaa haatan sii xoogaystey kaddib markii Djibouti laga celiyey Fahad Yaasiin oo laga qaaday xilkii Agaasinka NISA, balse uu Farmaajo oo uu gacan midig u yahay u magacaabay La Taliye Amaan Qaran.
Farmaajo ayaa Jabuuti eed dusha uga tuuray, balse Wasiir Dibadeedka dalkaasi, ayaa Madaxtooyada ku eedeeyey inay “jahawareer abuurayaan oo ay doonayaan inay xasaradda Somalia soo geliyaan Jabuuti oo aan shuqul ku lahayn.”
“Mar kasta oo uu [madaxwaynuhu] sii joogo oo sii wado samaynta tillaabooyinka sharci darrada ah ee aan dastuuriga ahayn, waxaan usii dhowaanaynaa dagaal sokeeye.” ayuu yir Ismail Osman, oo ah Agaasime Xigeenkii hore ee NISA oo haatan ku sugan Washington.
Hadalsame Media
