(Hadalsame) 07 Juun 2019 – Qoraalkani wuxuu ka tarjumayaa baad la sheegay in ay kooxda Al Shabaab ka qaaddo umadda Soomaaliyeed, gaar ahaan shacabka Muqdisho, taasoo la sheegay in DF Somalia aysan wax tillaabo ah ka qaadin, taasoo xitaa saamayn ku yeelanaysa mudnaanteedii ay indhaha dadka hortooda ku noqon lahayd hay’adda qura ee talisa, waxaa sidoo kale meesha ka maqan mas’uuliyaddii mujtamaca.
Weriye Yuusuf Garaad oo qoraal ku saabsan bal in heshiisna la raadiyo arrintaa ka sameeyay ayaa ku bilaabaya sidatan:
Maroodi weyn ayaa Xamar dhex taagan!
Ma arkin miyaa?
Keligaa ma aha. Qof aragtay ma jirto!
Ma qarsoona loomana jeedo.
Ama aan dhahee qof qiran in ay aragtay ma jirto.
Meel islama geli karaan in Ganacsi uu canshuur siiyo Shabaab, u hoggaansamo awaamirteeda, Shacab uu caddaalad u raadsado, Dowladdu ay la noolaato xaaladda, haddana qarax la shareysto.
Maxay qaadan doontaa in aan isu qiranno runta na hor taalla?
Nin aan is naqaan oo Madaxda Sare ee dalka ka mid ah ayaa hadda ka hor ii sheegay sheeko. Ereyadeyda iyo tacbiirkeyga marka aan ku sheego waa sidan:
Qaraxa Muqdisho kuugu horreeya waxaa laga yaabaa in aad tiraahdo xagguu ka dhacay?
Midka xiga in aad tiraahdo qof ehel ama saaxiibkeey ah ayaa ku dhintay.
Kan kuuga xiga aad tiraahdo dirqi ayaan uga badbaaday. Marka xigta in aad ku dhaawacnto.
Kan kalena adiga lagaa sheekeeyo. Sheekadana lagu gunaanado, Allow u naxariiso.
Sidaas miyaan wada sugnaa?
Culeyska ugu badan wuxuu ku dhacayaa shacabka. Ha noqoto caasimadda dalka oo kala xiran, oo isu socodku aad u adag yahay ama ha noqoto halista qofku og yahay in uu ku sugan yahay.
Mar kasta oo aan la qabsanno xaaladda oo aan la sii noolaanno, xalku wuu sii fogaanayaa. Qaraxa iyo dhimashaduna waa ay sii badan doonaan.
Howl aan ku hureyn, horaa loo fuliyaa.
Ganacsatada canshuurta siisa Shabaab, wadaaddo iyo xataa siyaasiyiinta qaarkood gacan waa ay ka geysan karaan in la soo afjaro colaadda Shabaab.
Soomaaliya nugeyl aan lagu aqoon ayay badeen dagaallada daba dheeraaday.
Nama soo marin xilli aan uga baahi badan nahay in aan joojinno xabbadda Soomaalida dhexdeeda ah.
Maalinta runta na hortaal la qirto ka dib ayay billaaban doontaa raadinta xal shaqeyn kara oo laga gaaro Shabaab.
Waxaa Qoray: Yuusuf Garaad
FG: Qoraalkani wuxuu xambaarsan yahay aragtida qoraha ku saxiixan
Hadalsame Media
