– Xafiiska Taageerada QM ee Somalia ee UNSOS ayaa ashtako u gudbiyey wasaaradda arrimaha dibedda Soomaaliya, isaga oo ka cowdey hagardaamo haysata heshiisyadii ay labada dhinac (QM iyo DF Somalia) horay u galeen.
Warqad la sheegay in ay ka timi dhanka QM oo la gaarsiiyey wasaaradda Arrimaha Dibedda ayay UNSOS ku muujinaysaa ashtako ka dhan ah DF ay qaabka ay ula macaamisho shaqaalaha UNSOS oo ku shaqeeya xayndaabka heshiis ka dhexeeya labada dhinac, kaasoo loo yaqaanno “SOMA” sida ay sheegeen.
QM ayaa tibaaxday in kulan dhexmaray Wasiirka Arrimaha Dibedda Soomaaliya Axmed Ciise Cawad iyo madaxa USOS Lisa Filipetto oo looga gol lahaa in isfaham wada shaqayneed lagu dhaliyo, aysan waxba kasoo naasa caddaanin, islamarkaana ay markasta caqabado hor lihi soo baxayaan.
Warqadda ayaa lagu sheegay in shaqaalaha QM ee Soomaaliya ay wajahayaan dhibaatooyin la xiriira xagga socdaalka iyo canshuuro dakhligooda iyo madaxooda laga qaado iyo sidoo kale rukhsadda shaqo (work permit) oo lagu dhibo ama lagala daaho, waxaa sidoo kale la canshuuraa alaabaha usoo degaya QM, kuwaas oo uu heshiisku ka rafacayo sida ay sheegeen.
QM ayaa sidoo kale ka ashtakoonaysa shuruudo ay sheegeen in lagu xiro aqoonsiga baasaboorka QM ama dokumentiga safarka QM ee loo yaqaanno laissez-passer (UNLP), iyo in shaqaalaha aan haysan UNLP ee Soomaaliya imanaya loo diido dal-ku-galka Somalia.
QM waxa ay sidoo kale sheegaysaa in shaqaalaheeda loo diido fiisooyinka soo noqnoqodka ee u ogolaanaya inay dhowr mar dalka soo galaan kana baxaan (Multiple Entry).
Cabashadan QM ayaa kusoo beegmaysa jeer aanu miisaali ahayn xiriirka labada dhinac oo woxoogaa jugi gaartey kagadaal markii ay dowladda Soomaaliya dalka PNG uga cayrisay wakiilkii QM ee Soomaaliya Nicholas Haysom, 1-dii bishii hore ee Jannaayo.
Hoos ka akhri warqadda…
Hadalsame Media