(Garden City, KA) 28 Jan 2019 – 3 nin oo Maraykan ah ayaa lagu xukumay 25 sanadood oo xabsi heer federaal ah, kaddib markii lagu helay dembi ah inay qarxin lahaayeen dhisme wayn oo ay Soomaalidu deggan yihiin oo ku yaalla galbeedka gobolka Kansas.
Patrick Eugene Stein iyo Curtis Allen oo kasoo jeeda Kansas iyo Gavin Wright oo reer Oklahoma ah ayaa weerarkooda u doortay dhisme wayn oo ku yaalla Garden City, oo ah magaalo yar oo ay ku nool yihiin 26,000, iyagoo bartilmaameedkooda u sababeeyay in meesha masjid ku yaallo.
“Xukunkani waa guul usoo hoyatey inta la dagaallamaysa dembiyada nacaybka ku dhisan iyo argagixisada maxalliga ah,” ayuu yiri qarreenka heer federaal ee Matthew Whitaker.
QORSHOHOODA & QAABKA LOO QABTAY
Nimankan oo marka ay sheekaysanayaan Muslimiinta ugu yeerayay ”Baranbarooyin” ayaa sida ugu xag-jirsan uguna cadowsan u adeegsanayay erayo muujinaya jugta ay la damacsanaayeen bartilmaamoodkooda.
Niman dharcad ah oo kiiskooda loo saaray ayaa duubayay wada hadalkooda, si loo badbaadiyo nafta dadka aan waxba galabsan ee ay gumaadi lahaayeen, sida lagu sheegay war kasoo baxay Waaxda Cadaaladda Maraykanka oo ay FBI hoos tagto.
Markii uu soo dhowaadey waqtigii weerarka, waxay nimanku isla garteen in 4 gaari oo walxaha qarxa laga soo buuxiyay lagu baakimo afarta jiho ee dhismahan ay Soomaalidu deggan tahay, si hubaal looga dhigo in uu dhoco qarax aad u daafad ballaaran oo uu dhismahani dhulka galo si aan qofna uga fiigin.
Stein oo ah horjoogaha nimanka ayaa deeto kulan la qaatay sargaal dhar cad ah oo FBI-da ka tirsan oo iskaga dhigay nin hubka suuqa madoow iibiya, si uu bambooyin ”uga soo gato.”.
Nimanka oo weerarkooda ugu tala galay maalintii xigtey doorashadii madaxtinnimada Maraykanka, ayaa la qabqabtay xilligaa bil ka hor, iyadoo lagu hayo wax kasta oo caddayn ah.
Soomaalida – oo Garden City u degtey wershadda hilibka baakadaysa ee halkaa ku taalla oo ay ka shaqeeyaa – ayaa soo dhoweeyay taageero maxalli ah oo ay u muujiyeen shacabka halkaa ku dhaqani.
“Fadlan, waxaan u baahan nahay nabad iyo nolol,” ayay tiri Ifrah Farah, oo xubin ka ah Jaaliyadda Soomaalida, sida uu sheegay KWCH oo la shaqeeya CNN.
READY TO MOVE ON: They were targets in a violent plot that’s resulted in three men heading to federal prison for decades. “Please, we need peace and love,” this woman tells Jennifer Herrera: https://t.co/5NKMmKMezp https://t.co/R84dg8oIOQ
— KWCH Eyewitness News (@KWCH12) January 26, 2019
Waxaa Diyaariyay: Maxamed Xaaji
Hadalsame Media
