(Stockholm) 10 Okt 2023 – Heshiiskii Tidöavtal ee xisbiyada maamulka Sweden haya iyo Sverigedemokraternas (SD) ayaa lagu xusay qodob dhigaya in la baaro suurtagalnimada in ajaanibta dalka looga masaafuriyo sababo la xiriira wax lagu sheegay ”anshax xumo”. Looma baahna xitaa in qofka dembi lagu helo si loo musaafuriyo.
Tusaale, ajaanibta kaddib weerarkii Xamaas ee Israa’iil ku damaashaaday waddooyinka Sweden waa in sharcigan lagu dhaqo, sida uu soo jeediyey Åkesson, hoggaanka xisbiga cunsuriga ah ee SD.
”Inaad wareegto oo aad taageerto fal argagixisanimo oo dhiig badani ku daatay, markaas waa ay iska caddahay in aanad ujeedo wax ku ool ah ka lahayn joogitaanka halkan,” ayuu ka sheegay kulan uu la yeeshay suxufiyiinta baarlamaanka Sweden.
”Markaa waxaad aadi kartaa waddan ay la fiican tahay inaad sidaas u dhaqanto,” ayuu yiri isagoo dhowr dhibaato ka arkaa dadka u dabbaaldegaya weerarka Xamaas.
”Tani waa muujinta dalka ay xisbiyada kale abuureen. Sweden waxay noqotay goob ay ka dhacaan dhammaan noocyada colaadaha caalamiga ah.” ayuu ku dooday Åkesson.
Erayga ‘anshax xumo” ee arrintan loo cuskaday ayaa se dhaliyey dood markii la soo bandhigay heshiiskii Tidöavtal. Sida haddii gubayaasha Qur’aanka sidoo kale ay tahay in loo adeegsado ereygan, Åkesson ayayse ku adkaatay inuu bixiyo jawaab toos ah.
Hadalsame Media
