(London) 04 Juun 2023 – Taageere Manchester United ah ayaa la xiray kaddib markii lagu sawiray garoonka Wembley isagoo xiran funaanad uu kula jees jeesayo musiibadii Hillsborough ee qabsatay taageerayaasha kooxda ay Woqooyi Galbeed ku xafiiltamaan ee Reds.
Sawirka taageerahan oo xiran funaanad ay ku qoran tahay ‘97 kuma filna’ ayaa lagu faafiyey Baraha Bulshada intii ay socotey ciyaartii final-ka FA Cup-ka ee Man United iyo Man City.
Musiibada uu ninkani tixraacayo waa shilkii Hillsborough ee sanadkii 1989-kii.
97 qof oo rag, dumar iyo carruurba leh ayaa ku dhintay dhacdadaa naxdinta lahayd ee ka dhacday garoonka Sheffield Wednesday kahor ciyaartii semi-finalka FA Cup ee dhex martay Nottingham Forest iyo Reds.
Booliiska caasimadda London ayaa se haatan xaqiijiyey in taageerahan xabsiga la dhigay.
Hadalsame Media