(Hadalsame) 27 Abriil 2023 – Hadal haynta iyo sheeko sameynta mooshinka suuqa soo galay.
Inkastoo aanu illaa hadda jirin mooshin si rasmi ah bannaanka u yaal, marka laga reebo fadhi ku dirir si sahlan suuqa ku soo galay iyo warqad qaab receipt u qoran oo baraha bulshada lagu faafiyay, haddana waxay u muuqataa in mooshinkii dhexdiisa boqol kaarto lagu dheelayo oo la abuurayo sida in dowladda dhexdeeda ay waddo.
Mooshin walba waxaa aas aas u ahaa saddex arrimood 1- cidda abaabuleysa , 2- ujeedka mooshinka 3- iyo saldhigga mooshinka, haddaanu saddexdaas arrimood laheyn mooshinka awooddiisa ma dhameystirna, isla markaana Mooshin aanu Madaxweyne qeyb ka aheyn ma socon jirin.
Sheeko sameynta Mooshinka waxay ka soo bilaabatay Nairobi iyo siyaasiyiin Cumrada isku wareystay. illaa iyo hadda ma jirto cid bannaanka la timid, Mooshinadi horay Xukuumadda looga keeni jiray ujeeddka wuxuu ahaa dhowr siyaasabood oo lagu saleyn jiray sida in Amniga lagu fashilmay iyo in amni darro ka jirto Muqdisho, balse intaas oo dhan xilligan ma jiraan, maxaa yeelay Xukuumaddu waajibaadkeeda koowaad waxay ka dhigtay xal u helida amniga, waxayna ka bilowday la dagaalanka Al-Shabaab oo laga qabsaday dhul ballaaran oo gaaraya illaa 500KM, aaggagii Muqdisho ka furnaa waxaa loo raray deegaano iyo goobo Al-Shabaab muddo 15 sano ay adkeyd iska daa in la gaaree amar la’aan shimbir aysan ka buubi karin.
Sababahaas oo la isku geeyay ayaa yareynaya suurtogalnimada in xilligan mooshin Xukuumadda loo helo duruuf iyo dood lagu socodsiin karo.
Laakiin mucaaradka bannaanka jooga, oo arrintaas is tusay, ayaa laga yaabaa inay hadal-haynta suuqa soo gashay uga dan leeyihiin inay tuhun kala dhex dhigaan xukuumadda iyo saaxiibo saami-wadaag siyaasadeed la ah balse hadda aanan xilal hayn, si kala shakigaas gudaha ah uu u abuuro xaalad ay mucaaradku ka faa’ideysan karaan.
W; Q: Cabdicasiis Golf Yare
Hadalsame Media
