(Washington, DC) 16 Maajo 2022 – Madaxwayne Joe Biden ayaa waxa uu saxiixay amar u ogolaanaya millateriga dalkaasi inay mar kale boqollaal ka mid ah ciidamada fuliya hawl-gallada gaarka ah geeyaan gudaha Soomaaliya.
Go’aankan ayaa inta badan meesha ka saaraya midkii Madaxwayne hore Donald J. Trump ee ahaa in ku dhawaad 700 oo askari oo dhulka ah oo halkaas ku sugnaa la saaray, sida ay sheegeen afar sarkaal oo xog-ogaal u ah arrinta.
Intaa waxaa dheer, Mr. Biden ayaa ogolaaday codsi ka yimid Pentagon-ka oo ku saabsan in la beegsado ku dhawaad 12 qof oo lagu tuhunsan yahay inay ka tirsan yihiin hoggaamiyeyaasha Al-Shabaab, oo ah koox xag-jir ah oo ku sugan Soomaaliya balse xiriir la leh Al Qaacida, saddex ka mid ah saraakiisha ayaa sidaas ku yiri NY Times.
Tan iyo markii Mr. Biden uu la wareegey xafiiska, duqaymaha cirka ayaa inta badan ku koobnaa kuwa loogu talagalay in lagu difaaco ciidamada saaxiibada la ah Maraykanku marka ay wajahaya khatar degdeg ah.
Isku soo wada duuboo, go’aamadan uu soo saaray Mr. Biden, ee ay saraakiishu ku sifeeyeen shuruudo aan la magacaabin, ayaa dib u soo noolayn doona hawlgalkii furnaa ee Maraykan ee la dagaallanka argagixisanimada kaas oo ahaa dagaal gaabis ah oo isu qori dhiibayeen saddex maamul oo Maraykan ah.
Tillaabadan ayaa ka duwan go’aankii sanadkii hore uu Biden Ciidamada Maraykanka uga saaray Afgaanistaan, isagoo sheegay in la joogo waqtigii la soo afjari lahaa “dagaalka abadiga ah” ee uu Maraykanku dunida ka wado.
Hadalsame Media
