Maraykanka oo keenay caqli uu ku cuno lacag balaayiin ah oo Afganistan ka taalla dalkiisa (Qorshe cusub)

0
Photo taken on Feb. 9, 2022 shows Da Afghanistan Bank DAB in Kabul, Afghanistan. Afghanistan has received a batch of 32 million U.S. dollars in humanitarian cash assistance on Tuesday, according to the country's central bank. (Photo by Saifurahman Safi/Xinhua via Getty Images)

(Hadalsame) 12 Feb 2022 – DF Maraykanka ayaa Jimcihii sheegtay inay bilowday in ay sii dayso ilaa 7 bilyan oo doollarka Maraykanka ah oo ah lacago la fariisiyey oo lagu hayo bangiyada Maraykanka oo ay leedahay Afghanistan – iyadoo aan lacagtaasi la siinaynin Daalibaanka.

Aqalka Cad ayaa ku dhawaaqay tillaabadan inay qayb ka tahay qorshe wax looga qabanayo “dhibaatada bini’aadminnnimo ee baahsan” ee Afgaanistaan, taasoo uu u arkay “xaalad degdeg ah oo heer qaran ah”.

Madaxwayne Joe Biden waxa uu soo saaray amar fulineed oo uu ugu yeerayo in la adeegsado awoodaha deg-degga ah si ay hay’adaha maaliyadeed ee Maraykanku u xoojiyaan inay ” xannibaan” hantida dalkaa taalla ee uu leeyahay bangiga Da Afgaanistan, oo ah Bangiga Dhexe ee waddankaaas taasoo dhan 7 bilyan oo doollar.

Qorshahan ayaa u qoondeeyay ilaa 3.5 bilyan oo doollar oo loogu talagalay dedaallada gargaarka, in kasta oo ugu dambayntii lacagta la wareejinayo ay ku xiran tahay dedaallo dacwadeed oo kala duwan oo socda si magdhow la sheegay in la siin karo wax lagu sheegay ”dhibanayaasha Maraykanka ee argagixisada Daalibaanka, oo ay ku jiraan qaraabada kuwii ku dhintay weerarradii Sebtembar 11, tiiyoo ay jirto in Daalibaanka aysan weerarkaa iyagu qaadin hal qof oo Afghani ihina aanu ku jirin dadka la sheegay inay fuliyeen.

Amarka ayaa yimid iyadoo Washington – oo diiday baaqyada Daalibaanka ee ah in la sii daayo lacagtan maadama aanay u aqoonsan kooxdan xagjirka ah inay tahay dowladda sharciga ah ee Afgaanistaan.

Toddobaadyadii la soo dhaafay, maamulka Biden ayaa sidoo kale cadaadis kala kulmay Koongarayska Maraykanka si uu dhaqaalahan ugu isticmaalo si uu wax uga qabto dhibaatooyinka dhaqaale iyo bini’aadminnimo ee Afgaanistaan.

Maalgelintii caalamiga ahayd ee Afgaanistaan ​​ayaa la hakiyay kaddib markii Daalibaanka ay la wareegeen bishii Agoosto ee la soo dhaafay, taasoo ka dhigan in balaayiin doolar iyo hanti uu dalkaasi leeyahay ay ku xayiran yihiin dibadda.

Sida laga soo xigtay New York Times, lacag in yar ka badan $ 7 bilyan oo doollar ayaa looga tegey bangiyada Maraykanka, oo uu ku jiro Bangiga Kaydka Federaalka ee New York, kaas oo sheegay hubanti la’aan ka jirta cidda awood sharci ah u leh diidmada in lacagtaa lala baxo.

Amarka Biden ayaa sii xumeyn doona xaaladda Bangiga Dhexe ee Afgaanistaan ​​oo horeyba uu xaalku ugu xumaa marka la eego lacagta adag oo iminka gabaabsi ku ah dalkasi, wargayska ayaa weriyay.

Dawladda Maraykanku waxay eegi doontaa inay fududayso helitaanka kala bar hantidaas ah iyadoo la sheegayo in sidaa loo yeelayo “danta dadka Afgaanistaan ​​iyo mustaqbalka Afgaanistaan,” sida lagu sheegay xaashida kasoo baxday xaqiiqda ee Aqalka Cad Jimcihii, balse waxaa meesha ku hoos aasan in marka lacagtaa lasoo saaro, taasoo muddo abuuri doonta dood sharci ah, uu Maraykanku dadkiisa u qaybiyo qaar kalena uu geliyo sanaadiiq uu sheegayo inay yihiin kuwo samafal, isagoo damacsanayn in $ 3.5 bilyan oo ah hantida DAB ama Bankiga Afgaanistaan in aan marna la gelin gacmaha Daalibaan oo haatan sharciyan iyagu maamula dalkaasi.

Hantida DAB ama Bankiga Afgaanistaan ee dunida taalla ayaa lagu qaddaraa mid ka badan ilaa $ 10 bilyan oo doollar, taasoo wada xayiran haatan.

Hadalsame Media

Facebook Comments