DEG DEG: Maxamed Xuseen Rooble oo loo magacaabay RW cusub ee dalka & war kasoo baxay Madaxtooyada oo shaki dhaliyey

0

(Muqdisho) 17 Sebt 2020 – Madaxweynaha dalka, Maxamed Cabdullaahi Farmaajo, ayaa Maxamed Xuseen Rooble u magacaabay Ra’iisul wasaaraha cusub ee Somalia, sida ku cad qoraal rasmi ah oo kasoo baxay Madaxtooyada qaranka.

Qoraalka ayaa u dhigan: “Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo ayaa si waafaqsan qodobka 90-aad ee Dastuurka Kumeelgaarka ah waxa uu magacaabay Wasiirka Koowaad ee Xukuumadda Federaalka Soomaaliya, kaddib markii Golaha Shacabku ay kala laabteen kalsoonida Xukuumaddii hore 25-kii bishan Luuliyo 2020,”

“Madaxweynaha oo la-tashiyo badan ka sameeyey ayaa maanta oo ay taariikhdu that 17ka Sebteembar 2020, Xeer Madaxweyne ku magacaabay Maxamed Xuseen Rooble xilka Raiisul Wasaaraha Xukuumadda Federaalka Soomaaliya, isaga oo ku soo xushay aqoonta, waayo aragnimada iyo kartida uu u leeyahay inuu sii ambaqaado dadaallada dowlad dhiska iyo horumarinta qorsheyaasha Qaran,” ayaa la daba dhigay.

Waxaa dardaaranka Madaxwaynaha ka muuqata inuu niyadda ku hayo muddo kororsi, marka la eego qaabka uu ula hadlayo RW cusub oo laga doonayo inuu kaliya agaasimo doorashada xigta, balse ay warka ka muuqato waxyaabo badan oo uu qaban karo RW waqti badan haysta.

”Madaxweyne Maxamed Cabdullaahi Farmaajo ayaa faray Raiisul Wasaare Rooble In uu deg-deg ku soo dhiso Xukuumad tayo leh oo dalka horseedda in ay ka dhaqan geilso doorasho , dadaal muuqdana gelisa sidii loo xoojin lahaa guulaha laga gaaray amniga, dib u dhiska Ciidamada Qalabka sida, horumarinta kaabeyaasha dhaqaalaha, baahinta adeegyada aas-aasiga ah, kamiro dhalinta dagaalka ka dhanka ah argagixisada iyo musuqmaasuqa,” ayuu lagu tirtirsiiyey.

”Madaxweynaha ayaa ku adkeeyey shacabka Soomaliyeed, hay’adaha Dowladda iyo indheer garadka dalka in ay ku garab istaagaan Raiisul Wasaaraha cusub gudashada waajibaadka Dastuuriga ah ee horyaalla, isaga oo ugu duceeyey in uu ka soo dhalaalo masuuliyadda adag ee ku aaddan u adeegidda dalka iyo dadka.” ayaa lagu soo afjaray.

Rooble ayaa madaxa ka ahaa Hay’adda Shaqaalaha Caalamiga ah ee ILO (International Labor Organization).

Hadalsame Media

Facebook Comments