”Waxaan ku mashquulsanayn aasidda Mahad iyaguna waxay qarax ku xirayeen gaarigii Cali Iimaan!” – Marqaati gacan 1-aad ah oo sharraxaya wixii dhacay (Qaybtii 3-aad)

0

(Hadalsame) 13 Agoosto 2020 – Anigoo meel gees ah taagan ayaa waxaa ii yimid wariyeyaal uu ka mid ahaa Abubakar Muxuyadiin Xashara oo ka tirsanaa idaacaddii Banaadir waxa ayna iga codsadeen in aan u raaco Raadiyo Banaadir oo aan wareeysi siiyo. Akhri qaybtii 2-aad…

Cali imaan ayaan u sheegay oo isna raac ayuuna igu yiri. Waxaa bilawday ka ambabixii qabuuraha laakiin annagu ma ogin, balse dhagar-qabayaashu way nala joogaan oo na dhex ordayaan oo inta aan ku mashquulsaneyn aaska ayay shirqool kale noo maleegayeen waxayna ku guulaysteen inay walax qarxa ku rakibaan gaarigii Cali Iimaan (AUN.

Markaan soo dhaqaaqnay oo soo qaadnay wadada oo ciriiri ah gawaarida oo badneyd awgeed ayuu mar qura qarax dhacay. Waan argagaxnay oo waan istaagney waxaana aragnay gaarigii Cali Iimaan oo qarxey wadadana ka baxay.

Hhalkaas waxaa ku geeriyoodey Agaasimaheenii Cali Imaan (AUN). Waa murugo iyo argagax kale oo hor leh. Maydkii Cali oo daqiiqado yar kahor nala hadlayay ayaan halkii ka soo qaadannay, xilli galab gaabad ah ayay ahayd. Subaxii dambe ayaan isagana aasnay.

Maanta oo ay dhacdadaas ka soo wareegeen 13 sanadood weli qalbigeeyga kama bixin waanan la murogoonayaa, hadda oo aan qoraalkaan qorayo waan ilmeeynayaa.

Allah ha u naxariisto walaaladey Cali Imaan Sharma’arke iyo Mahad Axmed Cilmi, qabrigoodana Allah ha u waasiciyo innagana gadaashood Allah nama fidneeyo. Aamiin.

Dhamaad….

Goobjooge: Xasan Muuse Sabriye

Hadalsame Media

Facebook Comments