(Tel Aviv) 09 Luulyo 2020 – Laba todobaad kahor, Wasiir Dibadeedka Urdun, Ayman al-Safadi ayaa isagoo dayuurad kuwa qutaamiga u kaca ah saaran wuxuu booqasho ugu tegey MW Maamulka Falastiin ee Mahmoud Abbas oo ku qaabiley madaxtooyadiisa Ramallah, sida uu qorayo Times of Israel.
Yeelkeede, dhiggiisa Masar, Sameh Shoukry, ayaa isna la marti qaaday, ujeedkuna wuxuu ahaa in sawirka lagu arko labada deris Carbeed ee Falastiin oo garab taagan Cabbaas oo wajahaya Israel oo si cad u sheegaysa inay qaadan doonto xitaa madaxtooyada uu fadhiyo ee Daanta Galbeed.
Masar iyo Urdun oo dagaallo badan la galay Israel, waxay markii dambe la galeen heshiisyo rasmi ah, balse waxay labaduba ballan qaadeen inay sidi doonaan qadiyadda Falastiin, balse markii ay Israel la bareertay inay bar goosato Daanta Galbeed, waxaa sawirka ka maqan Masar oo ilaa iminka ka aamusan arrintan.
Maqnaashiyaha Shoukry waxay tusmaynaysaa moowqifka Masar ee ku aaddan qorshahan ay Yuhuuddu waddo, iyadoo noo sheegaysa in arrinta Falastiin aysan hadda kaddib wax micne ah oo buuran ugu fadhiyin Masar. Sabab?
“Waxaa jira arrimo uga daran Masar oo haatan hor yaalla: xasaradda coronavirus iyo jugta dhaqaale ee uu u gaystey dalkaas oo ku tiirsan dalxiiska, faragelinta Turkiga ee ka socota dalka ay Masar xadka ugu dheer la leedahay ee Libya iyo biya xireenka Ethiopian Renaissance Dam oo halis ku ah amaanka qoowmiga ah ee Masar oo aad u tirsata dhibic kasta oo ka soo hoorta webiga Niilka. Waxaas oo dhan baa Masar uga daran in Falastiin la qaato,” ayuu yiri Ofir Winter, oo xiriirka Masar-Israel u daraasadeeya mac’hadka Daraasaadka Amaanka Qaranka ee Institute for National Security Studies ee Tel Aviv.
Waxaa jira dalal Carbeed oo 8 dal gaaraya kuwaas oo soo saaraya cambaarayn afka baarkiisa ah, iyadoo horay aannu u qornay inay sidaa u sheegeen isla Israel-ta ay cambaaraynayaan.
Hadalsame Media
