(Bologna) 14 Maajo 2020 – Cathy La Torre o ah gayfane ka ololaysa midab takoorka iyo sinji quursi una dhalatay Talyaaniga, ayaa bogeeda Instagram ku faafisay sheeko xiise badan oo dood cusub abuurtay, taasoo muujinaysa munaafaqadda lagu wajahayo Silvia Romano iyo Islaam qaadashadeeda, iyadoo sheegtay in loo maagayo inay haween tahay oo qura.
Hadalsame Media ayaa tarjumey qoraalka oo ay Cathy kusoo qortay af Talyaani fikirkeedana sababaynaya waa sidan:
”Sanadkii tegey oo qura waxaa soo Islaamay 3 qof oo Talyaani ah oo ay sii daayeen afduubtayaal haystey waxayna kala ahaayeen: Luca Tacchetti, Alessandro Sandrini iyo Sergio Zanotti.
Qofka 1-aad wuxuu aadey Afrika waxaana Burkina Faso ku afduubtay kooxda argagixisad ah ee Jnim, oo xiriir la leh Al Qaeda. Waxaa la sii daayey kaddib 15 bilood, oo ku beegnayd bil uun kahor.
Wuxuu qaatay Islaamka, mana jirin hal qof oo dood yar ka keenay, ka cowday ama ka hadlay.
Qofka 2-aad waxaa xadka Turkiga iyo Suuriya ku qabsaday koox fulisa dembiyada agaasiman, waxaana halkaa lagu haystey 3 sanadood, waxaana lagu sii daayey wada xaajood.
Wuxuu qaatay Islaamka mana jirin qof ka dooday, u dhaartay ama dookhiisa ku qoslay.
Qofka 3-aad, waa ganacsade Turkiga u tegey inuu soo iibsado Diinnaarkii qadiimiga ahaa si uu Yurub ugu sii iibiyo, waxa uu 3 sano u afduubnaa Al Qaacida, waxaa lagu soo furtay wada xaajood, sirdoon iyo diblomaasiyad.
Wuxuu qaatay Diinta Islaamka, mana jirin hal qof oo xitaa soo hadal qaaday.
Waxaa halkan taagan 3 nin oo Talyaani ah oo ay sheekadoodu la mid tahay midda Silvia, ma jirin qof maagay ama ka hadlay waxa ay guursadeen, waxa ay mareen iyo waxa ay samaynayaan.
Aanu runta isu sheegnee sow ma aha in Caa’isha lagu maagayo inay dumar tahay?
Xor ka noqo doorka ay kuu dhiseen bulsho xanuunsan.
Xor u noqo inaad qaadato diinta aad doonayso
Xor u noqo inaad Jalaabiib xirato
Xor u noqo inaad ahaato Caa’isha.” ayay Cathy warkeeda kusoo koobtay.
Hadalsame Media