(Garoowe) 20 Abriil 2019 – Saraakiisha maamulka Puntland ayaa magaalada Garoowe gaarsiiyay 5 qof oo loo haysto in ay wax ka ogaayeen dilkii Caa’isha Ilyaas Aadan oo inta la kufsaday hadana la dilay.
Eedeysanayashan ayaa la horkeenayaa Todobaadkan Maxkamada magaalada Garoowe si loogu qaado kiiska loo haysto ee dilka gabadha 12 sano jirka ahayd.
Hay’adaha ammaanka Puntland ayaa sheegay in raga kiiskan ay u hayaan ay ku jiraan kuwo isku dayay in ay baxsadaan hase ahaatee ay ku guulaysteen in gacanta ay ku soo dhigaan.
Saraakiisha ayaa sheegay in dadka kiiskan foosha xun loo haysto ay gaarayaan 7-qof isla markaana ay socdaan baaritaano dheeraad ah oo ay ku soo qabanayaan dadka kale e ee ka maqan kiiskan.
Deggaanada Maamulka Puntland ayaa marar badan waxa ku soo noq noqday falalka la xiriira Kufsiga taas oo keentay walaaca Bulshada rayidka ay ka qabaan xaalada tacdiga ee degganadaas.
Hadalsame Media
