(Boosaso) 11 Feb 2019 – Maamulka Puntland ee Soomaaliya ayaa ku dhawaaqay howlgal ka dhan ah dadka ka shaqeeya tahriibka ee ku sugan deegaanada maamulkaasi gaar ahaan Magaalada Boosaaso ee xarunta gobolka Bari.
Magalada boosaaso oo ah Xarunta Gobolka Bari ayaa inta badan waxaa ka baxa dad isugu jira Soomaali iyo Itoobiyaan waxaana halkaasi ku sugan Mukhalasiin shaqoodu tahay inay dadka tahriibiyaan iyagoo adeegsanaya doonyo.
Tahriibayaasha ayaa iyana u soo gudba dalka Yemen oo ay doonayaan inay uga sii talaabaan wadamada Khaliifka gaar ahaan Sucuudi Carabiya, laakin waxay la kulmaan dhimasho iyo inay badda ku daataan.
Taliyaha Ciidanka Booliska Puntland Muxudiin Axmed Muuse ayaa amar ku siiyay ciidamada Booliska inay ka hortagaan cid kasta oo isku-dayda inay dadka tahriibiso.
Ciidamada ku sugan Koontoroolada guud ahaan Magaalooyinka Puntland ayaa lagu amray inay gacanta ku dhigaan dadka doonaya inay tahriibaan iyo kuwa ka shaqeeya tahriibka ee loo yaqaano mukhalasiinta.
Hadalsame Media
