(Muqdisho) 04 Agoosto 2018 – Waa dhallinyaro aan si rasmi ah loo ogayn tiro ahaan inta ay gaarayaan, ha yeeshee waxaa iminka la aqoonsaday illaa iyo lix dhallinyaro.
Goobo ganacsi oo ku yaalla Yaaqshiid iyo qaybo ka mid ah Warta Nabadda ayay ka qaateen lacago doollar ah, iyagoo ku qaraabanaya magaca Al Shabaab.
Dukaan ku yaala wadada Jeneraal Daa’uud, isla markaana ku xisaabsan Warta Nabadda ayaa laga qaatay lacag dhan $150 doollar (boqol iyo konton doollar).
Sidoo kale goobo ganacsi oo ku yaala Yaaqshiid ayaa la xaqiijiyay in lacago laga qaatay.
Mid ka mid ah ganacsatadii laga qaatay lacagahaas oo diiday in magaciisa aan shaacino ayaa Yiri: ”Waxaa isoo wacay wiil dhallinyaro ah oo aan codkiisa ka shakiyay wuxuuna igu yiri waa Walaalaha Mujaahidiinta” sida uu hadalka u dhigay.
Waa uu sii hadlay ganacsadahaasi: ”Waxaa lagaa doonayaa xaqa taakulaynta Islaamiyiinta, sidaa daraadeed waxaa kuu iman doono dhallinyaro waa inaad lacagta u soo dhiibtaa.
“Markii aan dhiibay lacagta ayaan arintaan la kaashaday dhallinyaro kale oo xaafadda deggan, anigoo tixraacaya lambarka aan lacagta ku tuuray waxaana soo baxday in shabakadda lacagta iga qaadatay aysan Shabaab ahayn.
“Lix dhalinyaro ah ayaa ku lug yeelatay barnaamijkaan, waxaana qaarkood soo fara galiyay odayaasha xaafadda maadaama falkaan ay halis ku geli karaan,” ayuu hadalkiisa ku soo koobay.
Dhallinyaradii fashiliyay falkaan ayaa cabsi soo food saartay, sidoo kale raggii lacagta ka qaatay ganacsatada ayaa dhankooda ka cabsoonaya in Shabaab – oo laftooda lagu eedeeyo inay ganacsatada baadaan – ay wax yeelleeyaan.
Hadalsame Media
